Pengajahan Sang Hyang Yesus i

Pengajahan Sang Hyang Yesus

Saking Orti Rahayu manut Dane Lukas

Pangawit

Daging Cakepan Puniki

Cakepan puniki madaging pengajahan Sang Hyang Yesus, sane kapilih mangda prasida kaanggen paplajahan sadina-dina.

Sang Hyang Yesus lekad ring negeri Ibrani duang tali warsa idumun. Ritatkala Ida mayusa tigang dasa (30) warsa, Ida ngawitin pengajahan Idane indik Sang Hyang Pengardi. Ida pada akeh makardi paindikan sane ngangobin. Punika mawinan akeh anake dados pengiring Sang Hyang Yesus. Pengiring Idane pracaya yening Ida Sang Hyang Sabda. Ida rauh ka jagate dados manusa sane makta kapatutan lan karahayuan (Yohanes 1:1-14). Pengajahan Sang Hyang Yesus ring cakepan puniki nenten tios kapatutan saking Sang Hyang Pengardi.

Wit Cakepan Puniki

Cakepan puniki wawu kasalin ka basa Bali, nanging asline kasurat kirang langkung duang tali warsa idumun ring Timur Tengah. Irika bangsa Ibrani magama Ibrani. Pengiring agama Ibranine punika pracaya wantah Sang Hyang Tunggal sasembahan sane patut. Kenten pada Sang Hyang Yesus ninutin adat lan agama Ibranine. Duk punika, negara Ibrani kajajah olih bangsa Romawi. Bangsa Romawi punika nenten nyembah Sang Hyang Tunggal sekadi bangsa Ibrani.

Peta Ring Timur-Tengah

Cakepan Puniki Kasalin Saking sane Asli

Pidaging sastrane puniki kaambil saking Cakepan Suci. Sane mangkin sastrane puniki kasalin ka basa Bali madya mangda iraga mrasidayang ngresepang. Iraga patut nerima sastrane puniki dados kapatutan, krana pidagingnyane kasalin manut basa asli.

Ritatkala sastra puniki kasalin, para panyalin sastra ngimbuhin mangda aluh kaartiang sekadi:

- Judul cerita nujuin pengajahan.

- Catetan ring sor sekadi puniki [] nerangang paindikan sane kaimbuhin arti indik angka punika.

- Lengkara sane sendeh ring sastrane maarti krunane punika nenten wenten ring cakepan sane asli.

- Kruna sane nganggen tanda garis kajelasin ring kamus.

Carane Nganggen Cakepane Puniki

Pengajahan Sang Hyang Yesus inggih punika kapatutan lan piteket saking Sang Hyang Pengardi. Punika mawinan, pengajahanne puniki patut kapracayain lan katinutin. Cakepan puniki mrasidayang kawacen praragan. Nanging becik pada kaanggen ring sekaa alit sareng anak lianan sane meled ngresepang lan ninutin pengajahan Sang Hyang Yesuse. Tatujon ring sekaa alit puniki, inggih punika:

1. Saling piteketin lan saling tunas icayang.

2. Seken malajahin pengajahan Sang Hyang Yesuse alon-alon mangdane prasida karesepang.

3. Nyalanang pengajahane puniki ring urip iragane sadina-dina.

Wenten papat paplajahan sane aluh kaanggen ngawitin malajah olih anak sane wawu malajah Cakepan Suci, inggih punika:

Paplajahan 6: Sampunang ja Loba Kapinin Arta Brana

Paplajahan 7: Sampunang ja Sengsaya Indik Sane Kasaratang

Paplajahan 11: Indik Welas Asih Sang Hyang Pengardi

Paplajahan 14: Anak sane Matilesang Raga jagi Kaagungang

Yening kaanggen ring sekaa alit, dados nganggen panuntun sane ring sor puniki:

Penuntun mabligbagan ring pasamuan:

1. Ngaturang penyuksma.

“Ngiring ja iraga ngaturang suksma mangkin. Semeton jagi ngaturang suksma indik napi?”

2. Ceritayang ja pakeweh semetone suang-suang raris iraga saling tunas icayang.

“Napike semeton wenten pakeweh mangkin?”

3. Ngwacen utawi mirengin paplajahane puniki.

4. Saurin ja pitakenne puniki:

“Napi sane plajahin iraga indik Sang Hyang Tunggal ring ceritane puniki?”

“Napi sane plajahin iraga indik manusa saking ceritane puniki?”

“Sekadi napike sapatutne iraga nyalanang idup manut pengajahane puniki?”

“Kapining sirake sapatutne iraga nyeritayang malih ceritane puniki?”